大阪十天遊 Day 10 : 難波的最後一天

今日係最後一日喇，基本上今日係無地方去，只係呆太太最後衝刺日 ... 我地大清早就出去喇，條街冷冷清清，只有鋪頭員工收貨呀、準備開鋪呀咁 ... 都好，等我可以影幾張相，一到夜晚條街就超多人 ~

大阪十天遊 Day 9 : 即食麵發明館 & 京都

由於呆太太投訴無得 shopping 買野，餘下的 2 日行程要作出一些改動。原先計劃係日頭去參觀夜晚去 shopping 買野，但由於日本百貨公司大部份 10 點就關門，而大阪街上的商店又不多，所以夜晚 shopping 哩個 planning 係錯誤的。為此，今日和明日的行程要濃縮埋一日，而明天就可以留返呆太太 shopping 喇。

事不宜遲，出發 !!

大阪十天遊 Day 8 : 離開白濱，返回難波

大部份的溫泉旅館都包早餐的，同埋 check-out 時間都係十點咁上下，基本上想訓晏係無可能，今朝一早就起身去食早餐，之後再浸多浸溫泉就走人。個早餐同琴日梅樽那個早餐爭好遠，哩個早還超豐富 (掛住食，唔係影了好多相)，有乜理由早餐要食咁多野?

無記錯的話哩個應該係龍蝦粥

哩個九宮格，樣就好精美喇，但我唔太鍾意

大阪十天遊 Day 7 : 白濱 Adventure World

今日好早起身，一起身就落去浸返個溫泉先去食早餐，朝早無咁大風，浸得比較舒服，同埋可以睇到無敵海景。因為 11 點要 check out，食完早餐拿拿聲返上去執野 check out。今朝個早餐同昨晚個晚餐真係爭好遠 ... 昨晚個晚餐好食好多。

由於白濱交通不太方便，為免浪費時間等巴士，我地決定租一日車。Check out 之後本來想問一下點搭車到取車處，點知個經理好好人咁幫我地打電話去租車公司搵人來車我們，慳返一程車，之前 book 車的時候都講明無 pick-up service，就當 bonus 啦 .... 呵呵。

取車後就去第一個景點 ... Adventure World。

大阪十天遊 Day 6 : 白濱

我地哩十日行程入面，有 3 日 2 夜會去白濱浸溫泉，今日就要出發前往白濱喇。有 2 個方法可以去白濱，到難波 OCAT 搭明光巴士 (車程大約 3 個半小時，車費為 5,000 yen 來回)，或者搭 JR 到白濱站 (約 2 個半小時，車費約 5,000 yen)。搭 JR 會快一點，但價錢就貴一倍，所以我地都係決定搭巴士。大阪到白濱的明光巴士每一小時一班，但建議都係預早一兩日買定飛。難波 OCAT 在 JR 站附近，跟住 OCAT 個指示就會搵得到，買飛同上車的位置在 2 樓。

大阪十天遊 Day 5 : 高安、海遊館

第五日，我地會去高安食士多啤梨同埋去海遊館。士多啤梨係 45 分鐘內任食，為了食更多 (抵丫嘛)，早餐唔可以食太飽。我地早一晚就去便利店買杯麵，日本版杯麵 ... (即係 citysuper 賣成廿幾蚊一杯那一種)，今日早餐我地就係食杯麵喇。加埋個酒店茶包，今朝哩個早餐只係 353 yen。

日本版杯麵，仲要加大 ... 哈哈哈

大阪十天遊 Day 4 : 環球影城

今日行程好簡單，景點只有一個，就係環球影城喇。

一早出發，去"松屋"食個牛肉飯早餐就去搭阪神電鐵去西九条，出閘後過隔離搭 JR 去ユニバーサルシティ。我地平日去，唔係太多人。我地又一早 print 好優惠卷，入場費 5,500 yen，平了 600 yen。

 

大阪十天遊 Day 3 : 和歌山

第三日，我地會去和歌山 "黒潮市場" 同搭 "貴志川線列車"

用 Kansai thru pass 在 “大阪難波” 上車搭南海電鐵向和歌山方向 (同去關西空港同一個月台)，“和歌山市” 落車轉巴士去 "黒潮市場"。因為由 "和歌山市" 去 "黒潮市場" 巴士的班次比較疏，走一架車要等差不多 45 分鐘，所以時間都幾緊迫。因為無時間坐底慢慢食早餐，一人買一個麵包上車食 (唔知車廂可唔可以食野呢 ?!)，日本買麵包 .... 好貴 .... 但又真係比香港好食喎。

你睇呆太太食得幾滋味

大阪十天遊 Day 2 : 奈良、神戶

今日會去 2 個地方，奈良同神戶。哩 2 個地方其實隔得都幾遠，坐特急車都要成個鐘頭先去到。

一早起身，食埋昨晚食剩 2 件豬扒三文治做早餐就出發喇，去難波搭 "近鉄奈良線急行"，唔駛轉車直到 "近鉄奈良" 站，落車跟指示去奈良公園方向，你可以選擇搭巴士到春日大社之後行返出來，又或者好似我地咁行去春日大社再行返出來 .... (其實係因為唔知要行咁遠，哈哈 !!)

出火車行唔夠 10 分鐘就到奈良公園，因為奈良公園好大，10 分鐘只係去到佢個邊皮。入口處有婆婆擺檔賣 "鹿餅"，150円 一小筒 ... 都幾貴 ~ 呆太太都買一筒學人餵鹿，開頭都相安無事 ... 點知後尾就 .... (哈哈哈)。

150 yen 一小筒鹿餅，都幾貴~

大阪 10 天遊 Day 1 : 難波、心齋橋

8 點出發，9 點到達機場，拿拿聲 check-in 上機。時間計算得剛剛好，唔駛等就可以上機。未夠 3 點到達關西空港，先到 KAA 旅行服務台購買 3 Day Kansai thru pass (成人 5,000 yen，小童 2,500 yen) 詳情可參考哩度，此服務台亦有售海游館、環球影城等門票。

買完 Kansai thru pass 上一層，找南海電鐵的入口坐車到難波 ~

初步行程確認

Day 1 (22/1 Sat) 預計行程 :
1. 香港出發到大阪
2. Hotel Vista check-in
3. 搵地方買白濱車票及海遊館 package
4. 難波逛街

Day 2 (23/1 Sun) 預計行程 :
1. 奈良公園睇麋鹿
2. Mouriya 食神戶牛

Day 3 (24/1 Mon) 預計行程 :
1. 和歌山黒潮市場食 lunch
2. 貴志川線睇貓咪站長
3. 梅田逛街
4. 地魚屋台食魚生

Day 4 (25/1 Tue) 預計行程 :
1. 環球影城
2. 心齋橋逛街

Day 5 (26/1 Wed) 預計行程 :
1. Grandberry 摘士多啤梨
2. 海遊館

Day 6 (27/1 Thu) 預計行程 :
1. 搭明光巴士去白浜
2. Tore Tore 市場食魚生
3. 梅樽温泉 check-in

Day 7 (28/1 Fri) 預計行程 :
1. Adventure World
2. 天山閣 check-in

Day 8 (29/1 Sat) 預計行程 :
1. 搭巴士返難波
2. 難波逛街

Day 9 (30/1 Sun) 預計行程 :
1. 京都清水寺、八阪神社
2. 梅田逛街

Day 10 (31/1 Mon) 預計行程 :
1. 即食麵發明館
2. 梅田食日の丸漁港組合
3. 難波逛街
4. 返香港

By Roger

(準備篇) 2 - 酒店確認

已經確認好酒店喇，大阪會入住 Hotel Vista Grande Osaka，HK$860 一晚。而白濱就會入住天山閣同梅樽温泉。Hotel Vista 就唔講喇，可以參考返 (準備篇) - 大阪酒店，今次講一下白濱的兩間酒店 ...

(準備篇) 大阪酒店

忙完結婚呢個大 project...
又係時候要諗諗去邊度 honeymoon...

我地由本來諗住四月去沙巴...
變成依家一月去大阪...
仲要去成十日咁多...

基本上行桯安排全部都係我負責...
因為呆太太話之前結婚時的細節係佢負責得比較多
所以要我負責 honeymoon 喎...

首先當然要搵住宿先啦...
以下就係大阪酒店資料 ...